На працягу некалькіх гадоў вядучыя палітарганізацыі Беларусі супрацоўнічалі, каб узгадніць свае пазіцыі і бачанне пазітыўных перамен у Беларусі. Канферэнцыі, працоўныя сустрэчы і абмен вопытам па пытаннях рэформаў праходзілі як у Беларусі, так і за мяжой. У пачатку 2020 года сем палітычных арганізацый аб'ядналі свае намаганні ў распрацоўцы і прасоўванні дарожнай мапы "Рэанімацыйны пакет рэформаў для Беларусі". Былі абраны найбольш важныя сферы рэфармавання ў адпаведнасці з чаканнямі грамадзян краіны. У ініцыятыве прынялі ўдзел такія палітычныя партыі як Беларускі народны фронт, Беларуская партыя "Зялёныя", Беларуская сацыял-дэмакратычная партыя (Грамада), Беларуская хрысціянская дэмакратыя, Аб'яднаная грамадзянская партыя, а таксама рух «За свабоду» і цэнтр грамадзянскіх ініцыятыў "Наш дом" .

Распрацоўшчыкі дарожнай мапы маюць агульнае разуменне таго, што ў дзеючага кіраўніцтва краіны няма бачання па выхаду Беларусі з хранічнага крызісу і адказаў на выклікі, якія стаяць перад краінай. У апошнія 10 гадоў дзяржава не ў стане гарантаваць умовы для росту эканомікі і дабрабыту грамадзян. Пастаянна адбываецца скарачэнне сацыяльных гарантый, увядзенне новых падаткаў і збораў, рост тарыфаў ЖКГ. Аднак улады абмяжоўваюць канкурэнцыю, развіццё малога і сярэдняга бізнесу, магчымасці грамадзянскай супольнасці запоўніць прабелы ў сацыяльна-эканамічнай палітыцы дзяржавы. Нязменнасць вышэйшага кіраўніцтва прыводзіць да няздольнасці дзяржапарату да эфектыўнай рэакцыі ў крызісных сітуацыях, як ва ўмовах пандэміі COVID-19. Усё часцей рашэнні ўладаў ставяць пад пагрозу не толькі дабрабыт грамадзян, але іх здароўе і жыццё.

Дарожная мапа рэформаў з'яўляецца распрацаваным незалежнымі экспертамі планам па вываду Беларусі з сістэмнага сацыяльна-эканамічнага крызісу, які за апошнія 10 гадоў набыў хранічны характар. "Рэанімацыйны пакет рэформаў для Беларусі" адкрыты для ўдзелу кожнага прыхільніка пазітыўных перамен. Вы можаце далучыцца да абмеркавання прапаноў і прасоўвання дарожнай мапы рэформаў.